УУРХАЙЧИН БҮСГҮЙЧҮҮД ХӨГЖЛИЙН ТӨЛӨӨ ЧУУЛАВ

УУРХАЙЧИН БҮСГҮЙЧҮҮД ХӨГЖЛИЙН ТӨЛӨӨ ЧУУЛАВ

2019 оны 01 сарын 23
   

    

   ХХ зууны манлай бүтээн байгуулалт, дэлхийн шилдэг аж ахуйн нэгж, Хөдөлмөрийн гавьяаны улаан тугийн одонт “Эрдэнэт” үйлдвэр түүхт 40 жилийнхээ ойн хүрээнд “Уурхайчин эмэгтэйчүүд-Хөгжлийн төлөө” Үндэсний анхдугаар чуулганыг саяхан “Уурхайчин” соёлын ордонд зохион байгууллаа. 

    Энэхүү чуулганд Монгол улсын уул уурхайн салбарын 18 компанийн 400 гаруй эмэгтэй оролцож, хөгжлийн төлөө дуу хоолойгоо нэгтгэлээ. Уул уурхайн салбарт эрчүүдтэй мөр зэрэгцэн ажилладаг эмэгтэйчүүдэд тулгамдаж буй асуудлууд, цаашдын хөгжлийн зорилтыг хамтдаа тодорхойлж, төр засгийн сонорт хүргэхээр УИХ-ын зарим эмэгтэй гишүүд хүрэлцэн ирж чуулганд оролцсон нь өндөр ач холбогдолтой байлаа. Эрхэм гишүүд чуулганы нээлтийн үйл ажиллагаанд мэндчилгээ дэвшүүлж, уурхайчин эмэгтэйчүүдийн хүнд хүчир хөдөлмөр эрхлэлтийн талаар хөндөн, тэдний нийгмийн асуудлыг шийдвэрлэхэд өөрсдийн дуу хоолойг төр засгийн түвшинд ямагт хүргэж байгааг онцлов. 

    ДНБ-ий дийлэнхийг бүрдүүлдэг уул уурхай, эрдэс баялгийн салбарын үр өгөөж, хүртээмжийг хүйсийн ялгаваргүй тэлэх бодлого чухал. Товчхондоо хүйсийн тэгш оролцоог хангах, уурхайчин эмэгтэйчүүдийг хөгжүүлэх нь эрдэс баялгийн салбарын бодлогын нэг шинэ чиг баримжаа юм. Эрдэнэт үйлдвэр ажиллагсаддаа 24 нэр төрлийн нийгэм ахуйн хөнгөлөлт, тэтгэмж, тусламжийг олгодог бөгөөд 2018 онд нэг ажилтанд 11 сая төгрөгийн нийгмийн дэмжлэг үзүүлсэн байна.  

    “Уурхайчин эмэгтэйчүүд-Хөгжлийн төлөө” Үндэсний чуулганаар “Уул уурхайн салбар дахь эмэгтэйчүүдийн оролцоо”, “Хөгжлийн чиг хандлага”, “Эмэгтэйчүүдийн манлайлал”, “Эрх зүйн орчин  - эмэгтэйчүүд” зэрэг сэдвээр зохиогдсон салбар хуралдаанууд дээр илтгэл тавин хэлэлцэж, ажил амьдралын арвин туршлагаа хуваалцан, санал бодлоо солилцлоо. 

    Уул уурхайн компаниудын ажилчдын дунд эмэгтэйчүүдийн эзлэх хувь Монголд хамгийн их буюу нийт уурхайчдын 20 гаруй хувийг эзэлдэг нь мэргэжлийн байгууллагын судалгаагаар гарсан байна. Харин “Эрдэнэт” үйлдвэрийн 6000 гаруй ажиллагсдын 32 хувийг эмэгтэйчүүд бүрдүүлдэг. Энэ нь дэлхийн дунджаас төдийгүй улсын дунджаас өндөр байгаа нь бидний бас нэгэн бахархал юм. 

    “Эрдэнэт” үйлдвэр 40 жилийнхээ түүхэнд уурхайчдын нийгмийн цогц үйлчилгээг бий болгосон. Эмнэлэг, сувилал, сургууль, цэцэрлэг, спортын болон урлагийн мэргэжлийн байгууллагуудыг үүсгэн байгуулж хөгжүүлсэн нь эмэгтэйчүүдийн эзлэх хувийг нэмэгдүүлсэн. Хэдийгээр манай компани нийгмийн хариуцлагынхаа хүрээнд эмэгтэй ажилтнууддаа чиглэсэн олон төрлийн дэмжлэг, бодлого, хөтөлбөрийг хэрэгжүүлж байгаа ч цаашид тэдгээрийг илүү сайжруулж цар хүрээг нь нэмэгдүүлэх, цаг үеийн шаардлагаар улам боловсронгуй болгох зорилт бидний өмнө тулгарч байна. 

    Уурхайчин эмэгтэйчүүдийн Үндэсний чуулганаас Улсын Их Хурал, Уул уурхай, хүнд үйлдвэрийн яаманд дараах зөвлөмжийг элч төлөөлөгчөөр нь дамжуулан илгээлээ. Үүнд:
-Уул уурхайн салбарт жендерийн тэгш эрхийг хангаж, шийдвэр гаргах түвшинд эмэгтэйчүүдийн оролцоо, эзлэх байр суурийг нэмэгдүүлэх,
-Бага насны хүүхэд нь өвдсөн тохиолдолд ажилтанд эмнэлгийн хуудас олгох хуулийн зохицуулалттай болох, 
-Эмэгтэйчүүдийн эдийн засгийн тэгш эрхийг хангах зорилгоор бүх түвшний эмэгтэй, эрэгтэй ажилтнуудын цалингийн зөрүүг арилгаж, банк, санхүү, зээлийн бодлогоор дэмжих,
-Уурхайчин эмэгтэйчүүдийн үндэсний чуулганыг тодорхой чиглэлийн хүрээнд уламжлал болгон зохион байгуулах, 
-Уул уурхайн салбарт жендэрийн талаар баримтлах бодлого, уурхайчин эмэгтэйчүүдийн  хөгжлийн хөтөлбөрийг боловсруулж, хэрэгжилтийг хангуулах
-Уул уурхайн салбарт бүтээмжийн хөдөлгөөнийг өрнүүлэх, инновацийг хөгжүүлэх, эерэг хандлага, соёл, зан үйлийг төлөвшүүлэх гэжээ. 
-Мөн “Уурхайчин эмэгтэйчүүд-Хөгжлийн төлөө” Үндэсний чуулганаас нийт эмэгтэйчүүддээ хандан:  
-Нийгэм, гэр бүл, үр хүүхдийн хүмүүжил, төлөвшилд онцгой анхаарч, ядууралгүй, хүчирхийлэлгүй, тэгш шударга нийгмийн хөгжлийн тулгуур хүч байх,
-Уул уурхайн салбарт бүтээмжийн хөдөлгөөнийг өрнүүлэх, инновацийг хөгжүүлэх, эерэг хандлага, соёл, зан үйлийг төлөвшүүлэхэд манлайлах 
-Уурхайчин эмэгтэйчүүдийн холбоо байгуулах, мэдээллийн нэгдсэн цахим сүлжээ, санг бүрдүүлэх замаар эмэгтэйчүүдийн тасралтгүй хамтын ажиллагааг дэмжиж, хамтран хөгжицгөөе
-Нийтийн сайн сайхны төлөө эерэг өөрчлөлт авчрах сайн санал, санаачилгыг дэмжиж, төр засгийн бодлого шийдвэрийг хэрэгжүүлэн, удирдлагын шийдвэр гаргах түвшинд эмэгтэйчүүдийн эзлэх байр суурийг нэмэгдүүлье, 
-Тогтвортой хөгжил, хүрээлэн байгаа орчны нөхөн сэргээлт, эко цэвэр орчинг бүрдүүлэх үйл хэрэгт эмэгтэйчүүд тэргүүлэн оролцъё хэмээн уриаллаа. 

    Чуулганы төгсгөлд “Эрдэнэт” үйлдвэрийн Ерөнхий захирал Х.Бадамсүрэн хэлсэн үгэндээ “Өнөөдөр нар, хур тэгширсэн их сайхан өдөр байна. Уурхайчин бүсгүйчүүдтэйгээ бүтэн өдөр чууллаа. Энэ үйлдвэрийн 6000 ажилтан миний багийн гишүүд. Түүхт 40 жилийн хугацаанд уурхайчин эмэгтэйчүүдийн маань гүйцэтгэсэн үүрэг их. Чуулганаас гарч байгаа зөвлөмж, уриалгаас үзэхэд салбар хуралдаанууд тун амжилттай өрнөсөн байна. Эрчүүд бид эмэгтэйчүүдийнхээ хөлд чирэгдэж мэдэхээр байна. 

    Өнөөдөр цэцгэн дунд алхаж яваа мэт санагдаад сэтгэл маш өндөр байна шүү хэмээн хошигнов. Тэрээр хүүхдээ гурван нас хүртэл асарч буй ээжид “Эрдэнэт” үйлдвэр сар бүр 400 мянган төгрөгийн тэтгэмж олгодгийг 500 мянган төгрөг болгон нэмэгдүүлэх шийдвэрийг Эх үрсийн баяраар гаргахаа чуулганы индрээс зарласан нь бүсгүйчүүдийн сэтгэлийг огшоосон гэнэтийн шийдвэр байлаа.  Ийнхүү бүтэн өдөр ажил хэрэгчээр хуралдсан төлөөлөгчид ирээдүйн хөгжлийнхөө зорилтыг хамтдаа тодорхойлж, “Уурхайчин би” дуугаар ая дууны түрлэг өргөснөөр уурхайчин эмэгтэйчүүдийн Үндэсний чуулган өндөрлөв.

 

        Сэтгүүлч М.Одгэрэл
 


Энэ МЭДЭЭ танд таалагдаж байвал Like хийгээрэй. Танд баярлалаа.
Манай САЙТ танд таалагдаж байвал Like хийгээрэй. Танд баярлалаа.