ГЕРМАНЫ ФРАУЭНРАТ

(Германы Эмэгтэйчүүдийн Байгууллагуудын Үндэсний зөвлөл)

 

       

Deutscher Frauenrat (Германы Эмэгтэйчүүдийн Байгууллагуудын Үндэсний зөвлөл) нь үндэсний хэмжээний эмэгтэйчүүдийн 60 гаруй нийгэмлэг болон байгууллагыг эгнээндээ нэгтгэдэг. Тус байгууллагад мэргэжлийн болон шашны нэгдэл, улс төрийн намын эмэгтэйчүүдийн бүлэг, ҮЭХ, Германы Спортын холбоо, түүнчлэн нийгмийн болон улс төрийн янз бүрийн зорилго бүхий намын бус байгууллага гишүүнчлэлтэй байдаг. Тус байгууллага нь ХБНГУ дахь хамгийн том эмэгтэйчүүдийн байгууллага. Ашгийн бус үйл ажиллагаа явуулдаг бөгөөд Холбооны Засгийн газраас үйл ажиллагаа нь санхүүждэг. Түүнчлэн Герман Эмэгтэйчүүдийн зөвлөл нь төрийн бус байгууллага. Deutscher Frauenrat нь НҮБ-ийн Эдийн засаг болон Нийгмийн зөвлөлийн тусгай зөвлөхийн статустай бөгөөд Европын Эмэгтэйчүүдийн эвслийн гишүүн юм.

 

Зорилго

 

       

Ардчилсан нийгмийн гол зорилго нь хүйсийн эрх тэгш байдлыг хангах, ажлын байран дээр, гэр бүлийн хүрээнд, улс төр болон бизнесийн тавцанд, соёлын салбарт эмэгтэйчүүд болон эрэгтэйчүүдийн адил тэгш оролцоог хангахад оршино. Энэ талаар ХБНГУ-ын Үндсэн хуулийн гуравдугаар зүйлд заасан байдаг. Үүнээс гадна бүх л арга хэмжээг хүйсийн асуудлыг тооцох зарчим дээр тулгуурлан шийдвэрлэнэ. Өөрөөр хэлбэл, төлөвлөлт, хэрэгжүүлэлт болон үнэлэлт дүгнэлтийн бүх л шатанд эмэгтэйчүүд болон эрэгтэйчүүдийн амьдралын өөр хоорондоо адил төсгүй хүчин зүйлс, нөхцлийг харгалзана гэсэн үг юм. Мөн үүнээс урган гарах үр дагаврыг ч сайтар тооцоолно. Энэ талаар Европын Холбооны Амстердамын гэрээнд тусгасан байдаг бөгөөд ЕХ-ны шинэ Үндсэн хуулийн төсөлд ч оруулжээ. Deutscher Frauenrat болон Lobby der Frauen нь албан ёсны эрх үүрэг болон улс төрийн хүсэл зорилгын талаарх санал хүсэлтийг нийгмийн бодит байдалд нэвтрүүлэн хэрэгжүүлэхэд голлон анхаарч үйл ажиллагаа явуулдаг болно.

 

Арга хэмжээ

 

        Улс төрийн лобби бүлгийн хувьд тус зөвлөлийн үйл ажиллагаа ерөнхийдөө Холбооны Засгийн газар болон Германы Парламентад чиглэнэ. Өөрийн байр суурийг захидал, өргөдлөөр илэрхийлэх төдийгүй нээлттэй сонсголын үеэр ч танилцуулна. Холбооны яамдуудтай хамтран ажиллаж, Холбооны Парламентын гишүүдтэй ч уялдаатай үйл ажиллагаа явуулдаг.

        Тус зөвлөл нь өөрийн үйл ажиллагаа болон байр сууриа FrauenRat сэтгүүлээр дамжуулан хэвлэн нийтэлдэг бөгөөд хэвлэл мэдээллийн бусад хэрэгслээр ч үйл ажиллагаагаа сурталчлан таниулдаг. Эмэгтэйчүүдийн эрх ашгийг хамгаалах кампанит ажилд идэвхтэй оролцож, иргэний нийгмийн зарим хороо, холбоодуудтай хамтран ажиллаж, олон эвсэл, холбоо, сүлжээ, санаачилгыг дэмжин үйл ажиллагаа явуулдаг. Зөвлөлийн хүрээнд гишүүн байгууллага хоорондын уялдаа холбоог дэмжих, харилцан туршлага солилцоход ч дэмжлэг үзүүлэн ажилладаг аж.

 

 

Германы эмэгтэйчүүдийн талаар

 

        Түүхийн он жилүүдэд Герман эмэгтэйчүүдийн үүрэг оролцоо өөрчлөгдсөөр иржээ. Ялангуяа сүүлийн хэдэн арван жилд тус улсын соёл багагүй өөрчлөгдсөн нь нөлөө үзүүлсэн байна.

 

Түүхэн нөхцөл байдал

 

        Германы   нийгэмд    эмэгтэйчүүдийн үүрэг оролцоог дөрвөн “К” үсгээр илэрхийлдэг байжээ. Энэ нь герман хэлээр Kinder (хүүхдүүд), Kirche (сүм), Küche (гал тогоо) и Kleider (хувцас) гэсэн дөрвөн үгийг илэрхийлнэ. Тодруулбал, эмэгтэйчүүдийн үндсэн үүрэг бол хүүхэд төрүүлж, өсгөн хүмүүжүүлэх, шашны үйл ажиллагаа эрхлэх, хоол бэлтгэх, хувцас угааж, оёх гэсэн утгатай юм. Харин 20-р зуунд Герман эмэгтэйчүүдийн эрх үүрэг эрс өөрчлөгджээ. 1919 онд санал өгөх эрхтэй болсноор, эрэгтэйчүүдийн адил нийгэм, улс төрийн үйл хэрэгт өөрсдийн дуу хоолойг илэрхийлэх боломжтой болсон юм. Дэлхийн хоёрдугаар дайн дууссаны дараа эмэгтэйчүүдийг Trümmerfrauen буюу “нурангин доороос өндийсөн эмэгтэйчүүд” гэж тодорхойлох болсон байна. Дайнд бэртэж гэмтсэн хүмүүсийг асарч тойлох, нас барсан цэргүүдийг оршуулах, дайнд сүйдсэн хот сууринг босголцох хүнд бэрх ажилд эмэгтэйчүүд оролцож эхэлжээ.

 

Нийгмийн зарим харилцааны хувьд хуучинсаг үзэл хадгалагддаг ч, Герман улс нь Европын герман хэлтэн бусад орнуудаас эмэгтэйчүүдийн эрхийг хамгаалах, улс төрийн үйл хэрэгт оролцохыг  нь дэмжих тал дээр өндөр дэвшил гаргасан орон юм. Хөрш зэргэлдээх Швейцарт эмэгтэйчүүд холбооны түвшний сонгуульд оролцох эрх 1971 оноос, орон нутгийн сонгуульд оролцох эрх 1990 оноос эдлэх болжээ. Харин Лихтенштейнд 1984 оноос эмэгтэйчүүд санал өгөх эрхтэй болсон байна. Германы бүс нутгаас хамааран эмэгтэйчүүдийн эрхийг хамгаалах асуудал өөр өөр түвшинд байдаг. Өмнөд бүс нутагт, ялангуяа Бавари муж бусад мужтай харьцуулахад  хуучинсаг үзэлтэй. Харин хуучны Зүүн Германд эмэгтэйчүүдийн ажил хөдөлмөр эрхлэлтийг илүүтэй дэмждэг байх жишээтэй.

 

 

Гэрлэлт болон гэр бүлийн эрх зүй

 

        Баруун Германд саяхныг хүртэл гэр бүлийн эрх зүй нь эмэгтэйчүүдийг нөхөртөө үг дуугүй захирагдах ёстой гэж тогтоосоор иржээ. 1977 онд хуулиндаа өөрчлөлт оруулж, гэр бүл дэх хүйсийн эрх тэгш байдлыг хуулиараа тодорхойлсон байна. Зүүн Германд харин эмэгтэйчүүд илүү эрх эдэлж байсан бөгөөд ажил хөдөлмөр эрхлэх эрх нь нээлттэй байжээ.

 

1977 онд Баруун Германд даган мөрдөгдөж байсан гэр бүл салалтын тухай хуульд багагүй өөрчлөлт орсон бөгөөд тэдгээр шинэчилсэн дүрэм өнөөдрийг хүртэл даган мөрддөг. Эхнэр болон нөхөр аль аль нь санал нэгдсэн тохиолдолд тусдаа нэг жил амьдарснаар гэрлэлт цуцлагддаг бол, аль нэг тал нь зөвшөөрөөгүй тохиолдолд гурван жил тусдаа амьдарсан нөхцөлд автоматаар гэрлэлт нь цуцлагддаг байна. Мөн “түргэн салалт”-ын тухай зүйл заалт ч бий. Эхнэр нөхрийн аль нэг нь гэр бүлийн хүний зүгээс аюул заналхийлэл мэдэрч, цаашид хамтран амьдрах нь бодит аюул учруулж буй нөхцөлд гэрлэлтийг даруй цуцлах үндэслэл үйлчилдэг байна.

       

Сүүлийн жилүүдэд барууны орнуудын жишгээр Германд ч гэр бүл батлуулахгүйгээр хамтран амьдрах, гэр бүлийн харилцааны гадуур хүүхэд төрүүлэх тохиолдол нэмэгджээ. 2014 оны байдлаар төрж буй эмэгтэйчүүдийн 35% нөхөргүй буюу албан ёсоор гэр бүлээ батлуулаагүй байжээ. Гэхдээ хуучны Зүүн болон Баруун Германы бүс нутаг хооронд тус асуудлаар ялгаатай байдал ажиглагддаг байна. 2012 онд Зүүн Германд амаржиж буй эмэгтэйчүүдийн 61.6% нөхөргүй байсан бол Баруун Германд энэ үзүүлэлт 28.4% байжээ.

 

Гэрлэлттэй холбоотой бэлгийн харилцааны талаарх үзэл ч өөрчлөгджээ. Жишээлбэл, 1969 он хүртэл Баруун Германд завхайрах, гэр бүлийн гадуур харилцаа үүсгэх нь эрүүгийн гэмт хэрэгт тооцогдож байжээ.

 

 

Нөхөн үржихүйн эрүүл мэнд

 

        Германд эхийн эндэгдэл 100,000 төрөлт тутамд 7 оногдож байна /2010 оны үзүүлэлт/. ДОХ/ХДХВ-ийн халдвар насан хүрэгсдийн буюу 15-49 настай иргэдийн дунд 0.1% байна /2009 оны үзүүлэлт/. Нэг эмэгтэйд 1.44 төрөлт оногдож байна /2016 оны үзүүлэлт/. Энэ нь дэлхийн бусад улс орнуудтай харьцуулахад өндөр үзүүлэлт юм. Харин хүүхэдгүй байх тохиолдол өндөр хувьтай байна. 1968 онд Зүүн Германд мэндэлсэн эмэгтэйчүүдийн 25% нь хүүхэд төрүүлж байгаагүй гэсэн харамсалтай тоон мэдээлэл байна.

 

Үр хөндөхийг жирэмсний эхний гурван сард хуулиараа зөвшөөрдөг. Харин удаах саруудад эрүүл мэндийн шалтгаантай нөхцөлд зөвшөөрдөг байна.

 

        Дунд сургуульд нөхөн үржихүйн хичээл орохыг хуулиараа тогтоож өгсөн байдаг. Зарим Баптист шашинт эцэг эхчүүд Германы дунд сургуульд нөхөн үржихүйн хичээл зааж байгаа явдлыг эсэргүүцэж холбооны төдийгүй олон улсын шүүхэд хандсан байдаг ч, Герман улсын Үндсэн хуулийн шүүх, Европын Хүний эрхийн шүүх 2011 онд тус гомдлыг буцаажээ.

 

ЭРХИЙНХЭЭ ТӨЛӨӨ 620 КМ ГИНЖИН ЦУВАА ҮҮСГЭН ЖАГСАВ

 

       

Шинэ оны эхний өдөр Энэтхэг эмэгтэйчүүд эрхийнхээ төлөө жагсав. Энэтхэгийн өмнөд хэсэгт байрлах Керала мужид хүйсийн эрх, тэгш эрхийг шаардсан охид, эмэгтэйчүүд 620 км урттай гинжин цуваа үүсгэсэн байна. Орон нутгийн эх сурвалжуудын мэдээлснээр, арга хэмжээнд Керала мужийн 14 тойргийн эмэгтэйчүүд  3-5 сая эмэгтэй нэгдэж зам дагуу эгнэн зогссон байна.

      

  Эмэгтэйчүүд хэр хүчирхэг болохыг энэ арга хэмжээгээр харуулахыг зорьсон гэнэ. Мөн Энэтхэг эмэгтэйчүүд эвлэлдэн нэгдэж, харилцан биенээ дэмжин тусалж чаддаг гэдгийг ч батлахыг хүсчээ. Бүх л насны эмэгтэйчүүдийг сүмд очиж, залбирал үйлдэхийг зөвшөөрөхийг тэд энэ удаад шаардлаа. Энэ жагсаалаараа аливаа уламжлал, эсхүл нийгмийн хоцрогдол охид, эмэгтэйчүүдийг ялгаварлан гадуурхдаг байдлыг таслан зогсоохыг  хүссэн байна.

 

 

ГЭРЛЭЛТ ЦУЦЛУУЛСАН ТАЛААР ЭМЭГТЭЙЧҮҮДЭД МЕССЕЖЭЭР МЭДЭГДЭНЭ

 

        Саудын Араб улс энэ сарын эхээр “нууц” салалтад цэг тавьсан нэгэн шийдвэр гаргалаа. Эрчүүд гэрлэлтээ хүссэн үедээ цуцлуулж, энэ талаар охид эмэгтэйчүүд мэдэхгүй хоцрох тохиолдол их байжээ. Тэгвэл нөхөр нь гэрлэлтээ цуцлуулсан талаарх мэдээллийг Саудын Араб бүсгүйчүүд гар утасны мессеж үйлчилгээгээр авах боломжтой боллоо. Шүүх байгууллага эмэгтэйчүүдэд мессеж илгээх үүрэг хүлээжээ.

 

        Гэр бүлийн байдлаа тодорхой мэдэх нь эмэгтэйчүүдийн эрхээ хамгаалуулж байгаа нэгэн хэлбэр гэж хүний эрхийг хамгаалагчид үзэж байна. Шинэ арга хэмжээ нь гэрлэлт цуцлуулахад эмэгтэйчүүдэд өөрийн эрхээ эдлэх боломж олгоно. Өмнө нь эмэгтэйчүүд нөхөр нь урьдчилан мэдэгдэлгүйгээр гэрлэлтээ цуцлуулсан талаарх гомдол шүүх байгууллагад олонтаа ирдэг байжээ.

 

        Саудын Арабын угсаа залгамжлах хунтайж Мохаммед бин Салманы явуулж буй нийгэм, эдийн засгийн томоохон өөрчлөн шинэчлэлийн нэг хэсэг нь энэ шийдвэр болж байна.

 

АМЕРИКИЙН ХОТУУДАД ГУРАВ ДАХЬ ЖИЛДЭЭ ЭМЭГТЭЙЧҮҮДИЙН МАРШ БОЛЛОО

 

       

Америкийн томоохон хотуудад энэ сарын 19-нд Эмэгтэйчүүдийн марш боллоо. Гурав дахь жилдээ болж буй жагсаалаар эмэгтэйчүүд өөрсдийн эрх ашгаа хамгаалуулахыг шаардав. Нийслэл Вашингтонд болсон жагсаалд одоогоос хоёр жилийн өмнө хагас сая хүн оролцож байсан бол энэ удаад нэг мянга гаруй хүн оролцжээ. Харин Нью-Йорк хотод болсон жагсаалд хэдэн зуун мянган хүн нэгдсэн гэж The New York Times мэдээллээ.

        Хэдийгээр жагсаалд оролцогчдын тоо  жил ирэх тутам буурч байгаа ч, Америк бүсгүйчүүд өөрсдийн улс төрийн зорилгодоо хүрч эхэлсэн. Оны өмнө болсон завсрын сонгуулийн дүнгээр АНУ-ын түүхэнд хамгийн олон эмэгтэй хууль тогтоогчтой болсон.

        Түүхэндээ хамгийн олон буюу 277 эмэгтэй нэр дэвшиж, 130 гаруй эмэгтэй Конгрессын дээд болон доод танхимд сонгогдсон. Үндэсний, шашны төлөөлөл болсон бүсгүйчүүд АНУ-ын хууль тогтоох дээд байгууллагад ажиллаж эхлээд байна. АНУ-ын Конгрессын дөрвөн гишүүн тутамын нэг нь эмэгтэй аж.

 

ОХИД БҮСГҮЙЧҮҮДИЙН БАНЗАЛ ДООГУУР “ӨНГИЙВӨЛ” ХОРИХ ЯЛ ЭДЭЛНЭ

 

       

Их Британийн Парламент охид бүсгүйчүүдийн эрхийг хамгаалсан нэгэн шинэ хууль баталлаа. Охид бүсгүйчүүдийн банзал доогуур өнгийж, нууцаар зураг авсан этгээдэд хоёр жил хүртэлх хугацааны хорих ял оноохоор Будант Альбионы хууль тогтоогчид шийдвэрлэв.

       

Их Британийн бүрэлдэхүүн дэх Шотланд улс одоогоос найман жилийн өмнө холбогдох хууль баталсан. Англи болон Уэльс 2019 оны 1-р сарын 16-ны өдөр тус хуулийн төслийг баталлаа.

       

Ухаалаг утас хэрэглээнд өргөн нэвтэрснээр “апскёртинг” (англиар upskirting; орчуулбал - “хормой сөхөх”) тархжээ. Тиймээс дэлхийн улс орнууд ээлж дараалан тус хэрэгтэй тэмцэхээр хууль баталж байна. Гэхдээ одоогоор дэлхийн цөөн улс оронд холбогдох хууль хэрэгжиж байна.

       

Апскёртингийг гэмт хэрэгт тооцох санаачилгыг Лондон хотын иргэн 25 настай Жина Мартин анх гаргажээ. 2017 оны зун Хайд паркт болсон нэгэн тоглолтын үеэр өөрт нь энэ хэрэг тохиолдсоноор, охид бүсгүйчүүдийн эрхийг хамгаалах кампанит ажил өрнүүлж, 18 сарын тэмцлийн дүнд хууль батлуулж чадлаа.

 

Апскёртингийг өөр аль улс гэмт хэрэгт тооцдог вэ?

 

•     Австралийн бүх мужид апскёртингийг зөрчилд тооцдог байна.

•     Шинэ Зеландад нууцаар охид бүсгүйчүүдийн хормой доогуур зураг авсан, тухайн фото зургийг хадгалсан тохиолдолд гурван жил хүртэлх хугацааны хорих ял оноодог.

•     Энэтхэг улсад мөн адил гурван жилийн хорих ял оногдуулдаг аж.

•     АНУ-ын зарим мужид бусдын биеийн далд/нууц хэсгийн фото зураг авсны төлөө ял оноодог байна.

 


Энэ МЭДЭЭ танд таалагдаж байвал Like хийгээрэй. Танд баярлалаа.
Манай САЙТ танд таалагдаж байвал Like хийгээрэй. Танд баярлалаа.

Сэтгэгдэл бичих


Сэтгэгдэл 0